Բացահայտեք Հայաստանը FunTravel-ի հետ

Կիլիկիա

ԿԻԼԻԿԻԱ

Վայելեք ծովափնյա հանգիստ Միջերկրականի ափին, հրաշալի Կիլիկիայում,  այցելեք առասպելական Կապադովկիա, տեսեք  Երզնկան,  Սեբաստիան,  Կեսարիան,  այցելեք հայոց մայրաքաղաք Սիս,  հռչակավոր Տարսոն,  Պողոս Առաքյալի ծննդավայր, բերդեր, ուր փորագրված են հայոց թագավորների գրերը:

Օր 1

Վաղ առավոտյան Երևանից շարժվում ենք դեպի հայ-վրացական սահման: Հատելով նաև վրաց-թուրքական սահմանը՝ կմտնենք Արդահանի մարզ: Կարճատև դադար կառնենք ալիքոտ  Ծովակն Հյուսիսո (Չըլդըր) լճի ափին: Լիցքավորված դրական էներգիայով՝ կշարունակենք ճանապարհը դեպի Բագրատունյաց մայրաքաղաք  Կարս: Կանցնենք Կարսով ու  Սարիղամիշի անտառների կողքով կշարժվենք էրզրում-Կարին: Քաղաքում կկանգնենք  Սանասարյան վարժարանի շենքի մոտ,  կտեսնենք Էրզրումի բերդը, քաղաքի խորհրդանիշ համարվող այլ շինություններ: Մի փոքր հանգստանալուց հետո կշարժվենք Երզնկա: Դադար կառնենք և կվայելենք Երզնկայի` եռահարկ Գիրլեվիքի ջրվեժի ողջ գեղեցկությունը։ Գիշերում ենք Երզնկայում։

Օր 2

Նախաճաշից հետո կուղևորվենք պատմական Սեբաստիա (Սըվազ) քաղաք՝ Մխիթար Սեբաստացու ծննդավայր: Կանցնենք քաղաքով և ճանապարհը մեզ կհասցնի հնամենի Կեսարիա: Կեսարիայում կայցելենք գործող հայկական Սուրբ Գրիգոր Լուսավորիչ եկեղեցին, կտեսնենք նաև հարևանությամբ գտնվող հայկական վարժարանի շենքի կիսաավերակը: Ապա կշարունակենք ճանապարհը և կհասնենք  կախարդական Կապադովկիա: Կշրջենք հնագույն հուշարձաններով՝ սնկաձև բուրգերով ու ժայռափոր եկեղեցիներով հայտնի այս վայրում: Ցանկության և հնարավորության դեպքում կարող եք այցելել նաև  «Սնկաձև բուրգերի հովիտ-թանգարան» (լրացուցիչ վճարով): Գիշերակաց հյուրանոցում:

Օր 3

Առավոտյան հնարավորության դեպքում ցանկացողները կարող են գնալ  թռչելու օդապարիկով (լրացուցիչ վճարով), որտեղից բացվում է աներևակայելի տեսարան դեպի Սնկաձև բուրգերի հովիտ: Ապա հրաժեշտ տալով Կապադովկիային՝ կուղևորվենք հարավ՝ կկտրենք կանցնենք  Տավրոսյան լեռներն, ու Լեռնային Կիլիկիայով ճանապարհը մեզ կհասցնի  Դաշտային Կիլիկիա: Կտեղավորվենք Միջերկրական ծովի ափին տեղակայված  արևոտ Կոռիկոսի ծովափ:

Օր 4

Հանգիստ Միջերկրական ծովի ափին կամ էքսկուրսիա դեպի պատմական Սելևկիայի բերդ, խորհրդավոր «Դրախտ և դժոխք» և  առեղծվածային «Քարանձավ» (լրացուցիչ վճարով):

Օր 5

Հանգիստ Միջերկրական ծովի ափին: Ցանկացողները (լրացուցիչ վճարով) կարող են մեկնել  Մերսին և Տարսոն քաղաքներ, տեսնել  Սբ. Պողոսի ծննդավայրը և Սուրբ ջրով լի ջրհորը, Կիլիկյան Հայաստանի ժամանակ կառուցված  հայկական եկեղեցին ու  Կլեոպատրայի դարպասները: Օրվա մյուս մասը կանցկացնենք Մերսին քաղաքի առևտրային կենտրոններից մեկում կամ  նավահանգստում: Կվերադառնանք Կոռիկոսի ծովափ և կվայելենք գեղեցկագույն  մայրամուտը ծովափին:

Օր 6

Հանգիստ Միջերկրական ծովի ափին: Ցանկացողները (լրացուցիչ վճարով) կարող են մեկնել հռչակավոր  Ադանա` հայ գրչության կենտրոններից մեկը: Քաղաքում կտեսնենք 6-րդ դարից կանգուն կամուրջը և միանգամից կուղևրորվենք Կիլիկիայի հայկական թագավորության մայրաքաղաքներից ամենահզոր  Սիսը տեսնելու: Սիսից հետո կշարժվենք դեպի Կիլիկիո դաշտի արևելյան պահապան  Անավարզա քաղաք: Այնուհետև կտեսնենք Լևոն Ա թագավորի կառուցած  Լևոնի բերդ, որը հսկել է մետաքսի ճանապարհը: Կվերադառնանք Կոռիկոս:  Կարող եք նաև հաճելի ժամանակ անցկացնել ծովափնյա զբոսայգում:

Օր 7

Հանգիստ Միջերկրական ծովի ափին: Կվայելենք մեր վերջին օրը Կոռիկոսի ծովափին կամ ցանկության դեպքում կնավարկենք Կոռիկոսի ծովային բերդ, որտեղ մինչ օրս պահպանված են հայերեն արձանագրությունները: Երեկոն կանցկացնենք թեյի սեղանի շուրջ հաճելի միջավայրում:

Օր 8

Առավոտյան դուրս կգանք Կոռիկոսից և կշարժվենք դեպի Մուշ: Ճանապարհը կանցնի  արևային Ուրֆա քաղաքով, ուր դադար կառնենք Սուրբ ձկների ավազանի մոտ: Մի փոքր հանգստից հետո կշարժվենք  Դիարբեքիր: Այստեղ ևս կկանգնենք և դադար կառնենք քաղաքի պատմական կենտրոնում: Ապա Բինգյոլի լեռներով ճանյապարհը մեզ կհասցնի  Մշո դաշտ (ԿԱՄ Մուշ կհասնենք Մալաթիա և Խարբերդ քաղաքներով): Գիշերակաց Մուշում:

Օր 9

Նախաճաշից հետո կշրջենք Մուշի հայկական թաղամասով, որտեղ գտնվում է նաև  Սուրբ Մարինե եկեղեցու կիսաավերակը: Ապա կգնանք տեսնելու հայտնի Սուլուխի կամուրջը: Հրաժեշտ կտանք  Մշո դաշտին և կշարժվենք Բասենի դաշտ, կկանգնենք տուֆաշեն Հովվի կամրջի մոտ և մի փոքր հանգստանալուց հետո  Սարիղամիշի անտառների կողքով կհասնենք թագավորանիստ Կարս: Քաղաքում պտույտի ժամանակ կտեսնենք Կարսի բերդը, Առաքելոց եկեղեցին,  Չարենցի տան ավերակների վայրն ու  Վարդանի կամուրջը: Ապա Կարսից կշարժվենք թուրք-վրացական սահման և կվերադառնանք Երևան:

 

Ամրագրեք Ձեր արկածն այսօր

Հավելյալ տեղեկատվություն

Հայերեն

Կիլիկիա

Comments are closed.